 Այսօր Հայ առաքելական եկեղեցին նշում է Մեծ պահքի հինգերորդ կիրակին՝ Դատավորի կիրակին: Այն խորհրդանշում է այրի կնոջ և դատավորի մասին առակը: Այրի կինը սովորեցնում է ճանաչել աղոթքի ուժը` առանց ձանձրույթի: Այրի կնոջ կերպարը մեզ համար օրինակելի է, որովհետև ցույց է տալիս, թե ինչպես կարելի է անդադրում աղոթքով հաղթահարել կյանքի դժվարություններն ու փորձությունները` վստահաբար հավատալով արդար դատաստանին: Դատավորը, ով գիտի իր գործերը անձնական շահերի համաձայն դասավորել, ով նախապատվություն է տալիս «ցանկալի» դատերին, ում համար դատավորությունը միջոց էր դրամ շահելու և ոչ` արդարություն իրականացնելու, Աստծո հակադիրն է: Եվ եթե անգամ անիրավ դատավորը ստիպված եղավ ի վերջո լսել այրի կնոջ անվերջանալի գանգատները, զիջեց այրու թախանձանքներին, ապա ամենաբարի Աստված կլսի իրեն ուղղված խնդրանքները: Մեծ պահքի հինգերորդ կիրակին մեր հոգևոր կյանքի և քրիստոնեական նկարագրի մեջ ամրացնում է աղոթքի մեջ հարատևելու գիտակցությունը: Հիշեցնենք, որ Սուրբ Զատիկն այս տարի նշվելու է ապրիլի 8-ին:
| 
Главная 
